गड्या गाव आपलो भलो……


गड्या गाव आपलो भलो……

चेतन बोडेकर, सिंधुदुर्ग.
खराच सांगतंय तुका,
गड्या गाव आपलो भलो ||धृ||

मोकळी हवा
पोटभर जेवा |
मातीची घागर
नात्याक पाझर |
आणि चाय पिवुक आजुन आम्ही, वापरताव पेलो….. ||1||

कष्टाचो घास
गळ्याक नाय फास |
वळणाचो रस्तो
भाजीपालो सस्तो |
आणि साध्या - सुध्या आजाराक आम्ही, चघळताव पालो…||2||

रशयेक कुंभयो
परसाकडं तांबयो |
जोताक पाडो
बाळतीनीक काढो |
आणि रोगा- बिगाचो हयं, येत नाय घालो….||3||

फणसाच्यो गोटयो
नाय कपाळार आटयो |
देशीचो खंबो
पावण्याक कोंबो |
आणि नात्या-गोत्यासाठी, सदीचो दरवाजो खुलो…..||4||

भात आणि पिठी
दुधा-दह्याची वाटी |
तंबाखुची डबी
अळवाची वडी |
आणि दररोज लागता वासाक, शेंगटो नि बळो….||5||

परसात व्हाळ
भजनात टाळ |
गौरीक ववसो
गटारीक रसो |
आणि लहान - थोरा येका मतानं, करताव धयकालो….||6||


नांगर धुणी
चुलीत शेणी |
कंरदीचा पेपित्रा
नाष्ट्याक सकात्रा |
आणि बाजाराक पुरत नाय आमका, काखेचो ठेलो…||7||

वर्षाची जत्रा
नवी नवी पाखरा |
दोन पायाची गाडी
नववारी साडी |
आणि बाह्यरं- भुतूर जावकं, खांद्यार टाकतांव शेलो…||8||

खडखडे लाडू
मानाक साडू |
रखरखता ऊन
पडयेत हनीमून |
आणि व्हाळा - गंवडान व्हावता, तुडूंब भरान नालो…||9||

चाकरमान्याचा चेडू
भोवताली भिडू |
खोब-याचो चून
फोडणेक लसूण |
आणि राजरोस राबून आम्ही, फुलवताव मळो…||10||

वसरेक गप्पा
हवेतल्यो थाप्पा |
राजकारणाच्यो मशाली
नाक्यावर गजाली |
आणि व्हळयेच्या मांडार, जमता आमचो मेळो….||11||

घरापुढं खळा
मराठी शाळा |
देवापुढं घोंगडा
कारभारीन वांगडा |
आणि गावाकडचो झिल ,चेडवाक शोभात नादखुळो…||12||






Comments

Post a Comment